關菊英今日到商台接受馬浚偉節目訪問，菊姐話今次訪談係盡訴心中情，由70年代初講起，講到中段先知馬仔咁遲入行，馬仔話自己係1993年入行，相比菊姐又真係有段距離。 問到兩人有冇講感情事 ？菊姐笑言：「講呢啲，o依家唔興講呢啲。」

菊姐入行多年，從來都唔會主動爭取任何嘢，不過覺得自己好好彩，適當時候就遇到貴人遇到好角色，馬仔好佩服菊姐每次去到高峰會停下來抖一抖，菊姐話：「我要唞氣，冇咁好氣，自己出咗道都幾十年，唔擔心觀眾會遺忘我。」菊姐話已經出道40年， 馬仔就踢爆其實40年有多，菊姐即話：「我唔鍾意畀人知我入行幾耐，我係新人嚟㗎 。」問到會唔會舉行入行40週年演唱會， 菊姐話：「等我50年仲keep得到先啦。」現時菊姐處於放假狀態，噚晚先喺東京返香港，仲帶咗好多手信畀馬仔。