今午（8日）沙田日賽第二場五班草地1200米，開出大熱Win。沈集成馬房「盈多福」配史卓豐搏殺得手，單Win及組合獨贏A2分別派36及18元。

四歲英國馬「盈多福」當日在香港國際馬匹拍賣會，由劉耀棠、劉心暉與劉懿暉三父子投得，身價520萬元，之前11戰未開齋，只得一席亞軍。

「盈多福」今場初次在第五班跑，表現唔同晒，在史卓豐胯下克服負133磅，沿途守三、四位，入直路後力策下，小勝頸位而回，馬兒終於開齋。

「多福」系馬主劉耀棠一家向人非常錫馬，好似前韓國短途錦標前冠軍「積多福」，近日已入住澳洲Living Legends牧場養老，和香港前馬王「精英大師」、「牛精福星」等為鄰。而今日「盈多福」報捷，劉耀棠不在港無入場，賽後由家人代拉頭馬。

第二場第二至第四名分別為「明月昇輝」、「競駿時代」及「銀城福星」。

-----------------------------
新聞有價 你肯為《蘋果動新聞》付幾多錢?
https://hk.adai.ly/QDTT6y5mgX