「冇錢點裝修同去旅行?」
之之騷私伙巨鑽拒認霉美人
關之琳前晚在灣仔會展出席手機活動,對於有周刊形容她是「霉美人」,之之指該報道寫得畸形變態,且前後矛盾。對於被指頻接工作,大小通吃,佩戴巨鑽首飾示人的之之說:「冇錢又點裝修間屋同去旅行?」
關之琳、張震、任達華及胡敏珊等前晚往灣仔會展出席Nokia8800新手機活動,並獲頒獎項。關之琳前晚穿上Gucci低胸裙,配襯私伙鑽飾,豔光四射。有周刊指之之大屋搬細屋、接工作大小通吃,形容她為霉美人,之之前晚主動逐點澄清。
之之說:「我呢期真係紅!屋企裝修所以咪搬去serviceapartment暫住囉,又睇吓我會唔會搬返去(屋企)住?喺香港真係冇私隱,爭在未畀埋本紅簿仔人睇。」至於指她與馬清偉復合goodbyekiss,她沒好氣的說:「呢啲係普通社交禮儀,朋友有好多種,男男女女、老老少少,唔通面壁咩?」
周刊又指之之頻頻接工作,大小通吃,之之則說:「我上次咪講過,𠵱家冇拖拍咪接多啲工作囉,冇錢又點裝修間屋同去旅行呀?話我買二十五蚊對襪,唔通要買二千五百蚊一對襪咩?唔通食雲吞麵又話冇錢,要餐餐食福臨門,點解要寫到咁畸形變態,佢哋根本前後矛盾。我𠵱家又冇負擔,可以揀鍾意嘅工作做,係邊做邊玩,嗱,遲啲我就會同大班朋友去歐洲玩啦。」
前晚之之佩戴私伙巨鑽出席活動,她笑言自己是個愛吃魚蛋粉亦愛鑽石的女人,她說:「賺錢咁辛苦咪買嘢獎勵自己囉,本周刊都話馬生冇照顧我啦。」
此外,伍詠薇及榮雪梅前晚均以性感姿態示人,伍詠薇指身穿的Gucci裙是胞兄與阿嫂推薦她買的。兄長叫伍詠薇買性感衫,夫婿會否詐型?伍詠薇說:「長兄為父呀,佢哋應該係識英雄重英雄至啱。」
採訪:RitaLeung
攝影:MatthewLam
陳嘉容(右)及樂基兒(左)伴名車,打造香車美人畫面。
前晚Nokia活動吸引不少女藝人出席,如黃寶瑤(左一)、徐自賢(右二)等。