曾參加選秀節目《PRODUCE 101》男團版嘅林煐岷及金東賢，落選後組成二人男團MXM出道，人氣高企。MXM於今日首度襲港，於聽日喺九展舉行出道派對，不過兩人今日率先現身apm出席活動，同港迷提早慶中秋，吸引600粉絲逼爆商場。

約晏晝3點20分，MXM以輕便Look亮相，立即引起粉絲尖叫歡迎，兩人隨後以廣東話「大家好，我哋係MXM，好開心見到大家」向港迷打招呼。為配合中秋節，MXM喺燈籠上寫上中秋願望，金東賢表示想同港迷拉近距離，林煐岷就希望可以收獲更多嘅愛。

被問到首次來港嘅感想，MXM表示：「早就想見香港嘅粉絲，直接見到真係好開心。」金東賢又指見到apm好多舖頭，立即好想shopping，兩人又指來港想食點心、火鍋及蛋撻，以及想去尖沙咀睇夜景及鐘樓。

提到對方嘅優點，林煐岷就大讚金東賢好活潑、開朗，因為自己比較文靜，所以好羨慕，金東賢就指林煐岷好善良、好照顧他人。MXM表示除咗跳舞、唱歌，都好鍾意籃球、游泳、足球等運動，及後MXM就指港迷好熱情：「估唔到粉絲咁支持我哋，好感激。」又以「我愛你哋」向粉絲示愛。

及後MXM同幸運粉絲玩遊戲，先示範新歌舞步叫粉絲跳，不過最終揀唔到邊位係贏家就打和，而MXM得知粉絲係9月生日，立即獻唱生日歌冧粉絲。於第二個遊戲就同粉絲背對背夾住波行，引起台下粉絲尖叫。稍作休息後，MXM勁歌熱舞表演《Good Day》及《I'm the one》。

媒體訪問環節中，MXM指佢哋係公司首個偶像男團，所以由演出《PRODUCE 101》開始都感到負擔：「不過喺節目表現出好嘅一樣，得到粉絲喜愛，負擔感都少咗。」金東賢及林煐岷分別表示朴孝信及2PM前隊長朴宰範係自己嘅榜樣，想好似兩位前輩咁成為萬能藝人。提到《PRODUCE 101》嘅趣事，林煐岷表示：「因為係合宿，晚上一班練習生肚餓會煮公仔麵食，記得有一次煮到冇晒熱水，要去隔離樓宿舍借水。」及後MXM為粉絲送上簽名海報。