香港撥出巨款協助四川地震後重建，雖則血濃於水，但為咗唔好令香港人嘅錢被濫用、落格，俾貪官重建豆腐渣樓宇，議員要求久不久到四川視察都好合理。不過內地卻好避忌，對訪川要求諸多留難，竟然點名只容許30個議員月底赴川。
四川當局聲稱因工作繁重，招待唔晒全體60個議員，所以有此安排，係咪落閘封殺部份泛民議員，唔使講大家都明啦。既然係嗟來之食，12個獲放行泛民議員當然唔會咁順攤啃咗佢，八方聽聞佢哋反客為主，扭計想玩放飛機。白鴿黨仁哥、高達已表態嗰幾日唔得閒，甘乃威話要留喺香港開區議會，所以都唔會上機。

表明唔係玩杯葛

而卿姐稍後會出訪歐洲，為免太過舟車勞頓，都有可能唔北上。獲點名者唔去，黨團先斬後奏推舉張文光做後備，將佢踢畀中聯辦，四川當局唔收貨都冇辦法。公民黨梁家傑噚日亦話家有要事，面有難色咁同八方講，訪川行可能要無奈缺席。有乜咁緊要嘅事要辦呢？佢話要去英國幫女兒搬屋。陳淑莊聽到咁多人唔去，可能怕冇伴，亦擺出打退堂鼓姿態。
八方問過多個泛民議員，佢哋都強調今次唔係「總辭」（推辭個辭），只係咁啱大家都唔得閒，況且既然四川省政府咁忙，議員亦唔好意思打擾，如果自己有其他事做，就唔使勉強出發咁啫，絕對唔係杯葛。張文光就話家陣咁多人唔去，如果最終不足30人參加都唔畀換人出發，就證明內地真係玩針對。佢又指呢趟公務考察要自費，冇理由唔畀換人，唔通被點名者另有事辦，都要屈人畀錢參加？
訪川團下周初截止報名，榜上有名嘅何秀蘭話如果咁多議員抽唔到時間去四川，泛民應該傾傾呢個問題，係咪正式要求換人。佢建議30個名額可以按比例代表制分配，由各黨派彈性安排議員出發，一來公道，二來亦可以畀有專長嘅議員去四川實地視察，例如張文光咁，去到當地除咗睇重建工程，亦可以就小朋友重新入學提供意見，可能好過欽點30人成團㖭。

mailto:[email protected]