牆有紅杏好過滿地牆頭草 - 李八方

蘋果日報 2005/12/21 00:00


「滿園春色關不住,一枝紅杏出牆來」,在特區玩政治,少啲文學素養都唔得。陳太忽然出招,除咗令八方晨早爬起身衝去記者會,重要猛查詩詞字典,睇吓點解紅杏咁威,迫到堂堂老學究不顧身份口出惡言。
冇所謂啦,千古罪人都可以返去黨校演講,一枝紅杏亦難保有日開遍上亞厘畢道。陳太雖然只係見步行步,但煲呔已經老羞成怒。咁又難怪,當日大大聲話飲香港水流香港血,今日連搭一轉飛機飛上去幫香港人講句說話都怕影響錦綉前程。做人要有吉士噃,你估單係靠拉得人多就強政勵治咩。
煲呔應學吓大sir風範
記得八十年代初中英談判告急,大Sir鍾士元率領一眾行政局議員,就飛咗去倫敦幫香港人爭取權益,佢哋都係委任嘅,但都唔怕祖家唔高興。有例在前,點解今日特區政府唔敢北上?
撇開陳太以前係煲呔上司,身為退休公務員公開論政是否啱身份,佢喺記者會上所講嘅香港人都好啱聽。當然有好多人馬上猜度佢背後有乜動機邊個指使,係咪自己想選特首……唔夠人拗就玩陰謀論,都經常見。其實二○○七都冇得選特首,到二○一二陳太七十二歲,紅杏都謝啦。
喺特區玩政治除咗文學素養,更加重要係有票,今日立法會決戰,民主派只要有二十一票,就可以否決五號報告書。依八方睇,除非中央有重大突破,呢一仗政府冇乜機會贏;而中央唔會有乜大動作,因為方案通唔通過冇所謂,將來再傾啫,最緊要係冇意外。至於佢哋派人四出游說,話唔通過好麻煩,相信係盡人事而已。
特權分子倍增盞嘥錢
好多人話個方案雖然唔係十全十美,但都有進步吖;但係有乜進步呢?八百個選委增加到一千六百個,表面睇好似多咗人、民主咗少少,實際上就係由八百個特權分子,加到有千六個,令有特權嘅人多咗一倍就真。
至於多十個立法會議席,喺比例代表同分組點票機制綁死之下,六十個議員同七十個有乜分別呢,用多啲納稅人嘅錢囉。
陳太係A字頭,煲呔係B字頭,世事係整定嘅。一枝紅杏,點都好過滿地牆頭草。


爆料熱線:29290000、27860099
報料傳真:26239278
報料電郵:[email protected]
empty