樓市交投唔係咁好，低價成交多，在此氣氛下，估唔到重有買家願意追價，金豐易居崔佑興話，一名回流客，喺三個鐘頭內，兩度追價共三十萬元，購得西半山列堤頓道嘉和苑單位。
呢個客，回流本港兩個月到，先後睇咗三十個單位，最近睇嘉和苑高層B，九百一呎，鍾意佢中西合璧裝修設計，同埋無敵海景。
崔佑興話，兩個禮拜之前，嘉和苑原本有另一個高層，呢個買家當時因為要諗一晚，結果俾人捷足先登，今次見再有放售，梗係嗱嗱聲啦。今次作價比起兩周前嘅成交價重低少少，計落追完價都有着數，真係塞翁失馬。

施綺蓮阿媽賣樓
好耐都冇蒲頭嘅前亞姐施綺蓮，市場人士話，最近佢阿媽將西貢物業，以千二萬賣畀西貢海灣酒店洋業主。
物業由三幢三層高村屋組成，喺西貢景星廣場斜對面。施綺蓮阿媽揸咗好耐，之前租出去做意大利餐廳，點知個租客欠租，搞到佢去追租時大鬧餐廳，差啲上埋差館。唔知係咪因為咁，所以決定割愛。
至於買家，係近年積極喺西貢買嘢嘅澳洲籍投資者。宏億置業方國珊話，佢買嚟諗住自己開餐廳。物業五千呎，呎價二千四。

朗豪坊雕塑做地標
約人一齊玩或做嘢，好多時都會搵啲地標做約定地點，唔驚搞錯，好似銅鑼灣時代廣場門口大電視、尖沙嘴碼頭五支旗杆等，但係相約喺旺角又點算呢？
遲啲就唔使擔心嘞，因為鷹君朗豪坊，會擺放三十呎高嘅雕塑「Happyman」，咁第日一講就知邊度啦！
聽鷹君講，因為個雕塑又重又大，所以要分割搬運，到現場再砌番埋。
呢啲地標，好容易聚集人流，咁商場生意自然受惠啦。鷹君果然有諗頭。