港足世盃外圍賽將會喺下個月開波，11號對不丹，同埋16號對馬爾代夫，兩場波都安排喺旺角場上演，足總昨晚亦公佈票價，單場收$130，特惠票$40。球迷淨係睇票價就話收費偏貴，尤其要一啲平時冇睇開本地波嘅觀眾，走入球場捧香港隊，就更加係攔門價。有網民就話會等套票訂價出咗，先至決定入唔入場，希望平均收番大約$100個價，咁樣入場意欲會大啲。

其實，足總安排咗主場套票亦分兩種，其一係6月份兩場賽事，另一種就係包晒四場。價錢方面，足總行政總裁薛基輔就話，如無意外會日內公佈詳程，套票嘅平均每場價錢會畀單場票價平之外，更加會有港隊精品送。薛基輔指今次港隊比賽單場價收$130，有別於平時友賽嘅$100，主要係今次屬於有競爭性嘅正式比賽，所以門票價錢會有調整。

睇嚟，球迷們想入場支持香港隊，又唔想荷包太肉赤，一次過睇兩場或者四場應該走唔甩！