當年今日
關於我們

【八方年度選】薯片西餅白襪仔 七大「恩物」好架勢

蘋果日報 2017/12/29 07:30

薯片西餅白襪八方

每一年,總有啲人和事,特別難忘;今年亦有唔少物品,被重新賦予「新意義」:如果冇「佢」,清純白襪仔未必有咁脫俗嘅感覺;如果冇「佢」,黑絲同旗袍似乎勢不兩立;又若然冇咗「佢」,可能食薯片而不知何味。講到病假,大家諗起西餅;一地兩檢,卻會聯想釘書釘,2017年嘅香港,令人會心微笑,定係更為令人發笑?
一)白襪仔
白裇衫,因你變耀眼;白襪仔,都因為香港第一先生林兆波,變得格外迷人。呢位向來低調嘅學者,冇因為太太一登龍門成為禮賓府新主人,而改變既有嘅lifestyle:拒絕任何公職,樂做背後的小男人,依舊裇衫西褲走天涯,貫徹樸實風格。就連七一宣誓呢個大日子,林兆波都冇特別打扮,繼續以純情小白襪配黑鞋,估唔到「無招勝有招」,旋即成為當日「焦點」,搶晒太太風頭。
查實八方都問過林兆波,點解七一當日「白襪一疏」?佢笑住回應話得啖笑,仲自爆不為人知小秘密:「其實我唔鍾意著襪!」
而佢嘅坦率性格,亦從佢鬧林鄭唔瞓覺可見一斑,林鄭曾經自爆被老公埋怨工時長:「佢有幾晚話我黐線㗎,話『兩點幾喇喂老婆』」,似乎都好關注好打得嘅老婆究竟捱唔捱得,而且仲被讀者發現睇戲時主動調位,以便他人可以一家人排排坐,可見都係暖男一名,難怪白襪仔喺今年都成為純樸仙氣男嘅代名詞咯!
二)黑絲
本來呢,黑絲真係冇乜特別,最多大家諗起江美儀(唔會係蓋鳴輝啩?!),但今年黑絲呢樣貼身物品,卻因為香港首位女特首林鄭月娥,身價更矜貴。咪以為八方搞錯,乜林鄭唔係旗袍控,著旗袍多過著正裝,佢都話過有逾廿套旗袍啦。數量多,又如何?似乎都唔及佢突然換上黑絲,配個小手套仔換上少女味咁令人記憶猶新喎!
事緣七月底嘅《建軍大業》首映禮,林鄭一身紅噹噹透視連身裙、襯咗黑色小手袋同黑絲登場,據知在場人士見黑絲林鄭步近亦「眼前一亮」,估唔到佢睇戲竟然會大變身,仲創新地走少女風?
最搞笑係呢對黑絲有「前傳」,林鄭當選特首後冇耐,就畀讀者發現佢同老公去ifc睇戲後shopping,期間仲去咗掃黑絲,點估得到係喺登位後隆重登場?而呢對黑絲亦話畀大家聽,只要肯嘗試,凡事都有可能,禮賓府都可以係女主人!
三)薯片
薯片雖則係好食,但食得多會熱氣生暗瘡,但今年唔少香港人,似乎唔介意燥熱,瘋狂愛上薯片,直情唔使食呀,就咁離遠望下咋,就似乎有望梅止渴嘅神效咁嘞!唔係咩?明明特首小圈子選舉,得嗰1200人有份選,普羅大眾冇票喺手,但坊間全力支持前財爺曾俊華,儘管只係喺場外睇住呢場選戰,都好肉緊咁為佢打氣,全情投入薯片鬥娥特大戰,手持300張票嘅民主派更厲害,瞓身支持咗建制派嘅薯片叔,可見佢嘅魅力沒法擋!
相信大家都估唔到,呢片薯片旋風,由年頭帶到落年尾。3.26特首選戰後,薯片行情仍然看漲,大家食過翻尋味,冀望佢可以同田大少、曾鈺成組成「JT黨」,繼續喺為大家帶來開胃嘅精神食糧,可惜「JT黨」胎死腹中,令一眾薯粉大失所望,好在呢,薯片叔冇收埋自己,反而喺年底到電台做節目,仲要因為主持節目惹嚟娥特辦狙擊。唔知市民對薯片嘅熱愛,明年會唔會減退呢?
四)西餅
今年香港薯片大賣,西餅卻滯銷,點解?因為逢請病假都要交餅咭,大家見到西餅,仲唔大叫怕怕?教育界今年都算多事之年,大學有港獨標語風波、中學有洗腦座談會,小學則由德興「一枝獨秀」,前校長陳章萍治下不單止有「影子學生」,校政更混亂,要求每位教師每請一日病假,就要交出6張餅卡或者300元,慶祝自己病癒兼答謝代課老師嘅辛勞,試問大家對西餅點會仲有胃口?好在陳章萍被罷免後,新校長蕭麗珊取消咗西餅制,仲笑言「西餅食得多會肥」,令人回味無窮!
五)釘書釘
本來無一物,何處惹書釘?當今年中大家因為高鐵一地兩檢爭議鬧到熱哄哄,建制話至緊要方便、民主派死守不容割地兩檢之時,一粒粒嘅釘書釘,似乎霎時扭住輿論導向。民主黨黨員林子健8月中突然見記者,報稱被喺旺角被擄走,醒後發現被人用釘書釘喺大腿上釘咗好多十字架,暗示又係誇境執法個案,事件離奇曲折,最後佢反而被警方以誤導警務人員罪拘捕。到底啲釘喺點解會出現?至今仲係一個謎,唔知2018年,會唔會解開呢個謎底?
六)國旗國歌
如果數返上一年,國旗可謂獨領風騷,熱血公民鄭松泰喺立法會大會上倒插國旗,惹嚟建制派追殺,今年9月終被法庭判罪成罰款5千。估唔到國旗案剛平,又有國歌法再起,拍住成為年度「恩物」!人大常委會啱啱喺10月嘅會議,通過將國歌法列入港、澳《基本法》附件三嘅草案,特區政府亦已就國歌法開展立法工作,唔少建制派仲出言恐嚇,講到國歌法可以有追溯力。乜嚴肅唱幾句國歌就可以令人更愛國?八方只知明年可能見到成街人突然肅立頭岳岳!
七)何執葉
吓,乜何執葉已經變成一樣物品?係呀,君不見一提起執葉,大家腦裡一定彈出立法會議員何君堯呢個咁具標誌性嘅人物,輕易成為今年最熟悉嘅構想圖。查實職業無分貴賤,無論執業律師抑或執葉工人,個個都有一技之能,同樣要尊重,大家唔順氣嘅可能係何君堯明明無喺英國或新加坡執業,卻報稱執過業。何君堯其實之後 知衰,話係「無心之失」,指有人若認為構成誤導,願意道歉;唔知嚟緊新一年,佢會仲有冇咩嘢驚人之舉,呈獻公眾,娛樂無窮?
empty