港大法律系副教授戴耀廷發起「雷動計劃」，希望非建制派可以喺9月立法會選舉搶攻過半議席，呢個計劃希望搵到25萬人做「聰明選民」，將投票意向匯報畀一個中央系統，相關資訊經整合及調整後，再畀當中5萬名「雷霆救兵」作策略性投票。

「聰明選民」近日已經起動，5月1、2日開始進行民調系統測試，由一班IT界組成「公民聲吶」，以滾動投票方式畀民主派選民即時投票兼睇結果。

據知民調內容都係問上屆支持邊個？今屆又會投畀邊個？而可以選擇嘅名單，係按傳媒報道而定出嘅出戰隊伍，好似「超級區議會」組別，截至今日下午有371人投咗投，最多人投「未決定」，26%；第二位係公民黨，冇寫明出戰人選都有22%；蠢蠢欲動嘅梁耀忠所屬嘅街工就有16%；至於現任代表民主黨涂謹申，暫時有12%支持。

戴耀廷就同八方講，呢個系統係由一群IT朋友開發㗎，宜家正進行大型測試，會一步步優化，未來日子會配合「聰明選民」運動㗎。