當年今日
關於我們

  高官留鬍鬚今年剋滯 - 李八方

蘋果日報 2003/09/30 08:00


唔知係咪學過刨鬚嘅男人,會特別好勇鬥狠啲?新科工商及科技局局長曾俊華,被問及誠哥提出嘅邊境工業特區大計,竟然大膽到咬牙切齒咁話不可行,又話係落後於形勢,因為「屍爬」已經豁免好多樣工業產品嘅關稅,又使乜架床叠屋咁另外開闢過一個河套邊境工業免稅區?
嘩,董班子7.1之後,經過集思會、腦震盪,果然真係有新思維、新作風。連誠哥都敢窒,曾俊華知唔知碇呢?
佢應該擘大眼睇真啲,胡總書記接見嘅富豪團,李超人坐嘅係邊個位。誠哥講嘢一向小心謹慎,佢為咗改善就業,幫補經濟,無限智慧眼光構思出嚟嘅救港良方,曾俊華諗都唔諗就話唔收貨,真係冇厘厚道。

「屍爬」優惠去得盡?
中環行政界耳語:李超人嘅邊境工業區建議,雖然工聯會鄭耀棠都提出過,今次去到北京咁遠,親自喺國家領導人面前痛陳利害,冇番咁上下牙力、影響、把炮,又點會亂咁表態?會唔會係中央另有高人,唔係咁同意「屍爬」有理冇理乜都免關稅嘅優惠政策,覺得去得太盡,國家接濟香港,十三億人民重有好多冇書讀、冇衫着,要李嘉誠基金會年年億億聲咁捐款,𠵱家成班富豪,廠就識得開設喺內地,廉價勞工又識得剝削,高爾夫球場member就愈做愈豪,紅酒又愈飲愈貴,喺珠三角低成本製嘅產品,傾銷去美國,已經賺到盤滿缽滿,反銷內地,又享受埋零關稅,貧富更加懸殊,咪搞到國家會出現陳勝吳廣?
點解咁奇,「屍爬」零關稅呢頭簽字,嗰頭阿誠哥又主張話將免關稅嘅工業加工區局限喺河套咁啲大地方呢?
曾俊華激動瞓唔着
曾俊華話,「屍爬」簽署,佢心情激動,夜晚瞓唔着,佢認為國家同政府已經提供咗塊靚地,日後只有靠香港人施肥播種嘞。唔係喎,李超人就話,係深港邊境嗰塊地啲土靚啲喎,唔知點解7.1之後,政府官商,嘴形大亂,7.1遊行係好事定壞事,係港人表達民意定係想搞動亂,已經有幾十種講法,定係今年流年,專剋有鬍鬚嘅高官,定係原來曾俊華咁講,係刻意證明阿董並冇官商勾結,大家其實各有各諗?實情係點,睇嚟又要勞煩中央出句聲,教吓下低班公僕同工商界咁樣買大細嘞。



傳真︰2623-9278
電郵︰[email protected]