曼城禮拜日喺英超畀愛華頓炒四球，呢個賽果又成為咗歐洲廉航Ryanair抽水兼宣傳嘅機會，話說佢哋即刻喺官方Twitter出post，想話谷下英國曼徹斯特機場嘅旅客流量，無論係出發定回程都通殺咁話喎。

Ryanair嘅post就見到哥迪奧拿坐住廉航由葛迪遜公園離開，下面嘅宣傳語句就係7.99鎊（約75港元）就有得飛。過多兩個零鐘，利物浦喺奧脫福畀曼聯逼和1:1之後，Ryanair又出多個新post，今次就輪到高路普喺奧脫福走佬。其實Ryanair一向都鍾意用歐洲足球嚟抽水兼宣傳，之前國際米蘭炒咗教練法蘭迪保亞果陣，佢哋一樣有出post。不過講真吖，次次出post嘅形式都一模一樣，可唔可以畀少少新意咁呢？