若嫌「大話英、狼振英、僭建英」呢堆花名叫到悶，大可以叫梁振英做「抽水英」。如果奧運有抽水比賽，香港嘅小圈子代表抽水英肯定奪金！
僭建醜聞，佢拖到家都唔肯交代；劏房局長問題，亦唔見佢出嚟頂。但當香港單車運動員李慧詩喺8月4日凌晨兩點幾攞銅牌，抽水英就半夜三更以9秒9極速，勒令新聞處幫佢發稿祝賀。由阿詩攞牌到振英抽水，前後不足半小時。但係呢，其他運動員無論點努力，由於冇牌攞，就你死你賤。

到咗噚日，抽水英本來放假，但佢一知道長者正式可以用兩蚊雞搭巴士，就晨早撲入巴士站，同老人家講話呢個係小小心意。其實呢，呢單嘢根本就唔關佢事！呢個「心意」係由上屆特首煲呔曾喺《施政報告》提出，但抽水英就一個唔該，當係自己政績。
勞福局局長張建宗全程陪住振英哥見老人家，但見張局長低頭不語，唔知佢個心諗緊乜呢？有人就睇唔過眼話，上月底九萬人上街反洗腦國民教育，抽水英就話「國民教育唔係呢屆政府提出」，咁又唔見佢話呢個兩蚊雞計劃，唔係佢呢屆政府諗出嚟？
抽水英有鑊唔孭，有彩就攞。公民黨余若薇都睇唔過眼，去信批評佢身為特首，竟然喺佢老友「劏房波」醜聞纏身時、沙灘被膠珠覆蓋嘅時候，走咗去放大假嘆世界，咁只會令公眾覺得到佢想逃避責任！

mailto:[email protected]