上山詩鈉囡囡HilaryFan、翁靜晶囡囡劉萬儀(Jeanne)、趙雅芝囝囝黃愷傑、張建聲同湛琪清,今日喺銅鑼灣出席一個化妝品牌舉行嘅Cafe啟動禮,Hilary、Jeanne同湛琪清喺活動中炮製健康美食。
講到兩位星二代Hilary同Jeanne為呢個化妝品牌拍攝照片,Jeanne表示:「成面紅色都有少少驚,不過影咗相又覺得OK。」媽咪翁靜晶有冇畀意見﹖佢話:「都有,佢都覺得好靚。」
身為星二代,一舉一動都備受注目,有時仲會被人拎嚟同自己父母比較,不過Hilary同Jeanne認為冇壓力,Hilary話:「例如我post嘢,呢個係我選擇,所以唔應該介意人哋睇到。」除咗出席呢類活動外,會唔會拍戲?Hilary話:「我就嚟會去美國波士頓讀室內設計。(同男友一間學校?)係一樣,不過唔同學院。」
為咗男友而去美國讀書?Hilary表示兩年前已經睇呢間學校。Hilary指自己仲細,所以唔會同男友同居,提到男友,Hilary透露已經拍拖一年多,已見過家長上山詩鈉。問到感情係咪穩定,佢竟然尷尬笑住話:「唔知呢!」
另一位星二代黃愷傑最近參加江蘇衛視真人騷《壯志凌雲》,同夏雨、張雨綺等爭冠軍,參賽者要接受飛航訓練,冠軍者可得到機師牌照。怕唔怕危險?媽咪擔唔擔心﹖黃愷傑指屋企人初頭都會有啲擔心,但係做機師係佢自細嘅夢想,所以屋企人放膽叫佢去做,但最緊要注意安全。