裕美、吳日言、劉敬雯等今日喺中環參加1.5K嘅跑步賽事，裕美話平時都有跑步習慣，試過一星期跑3、4日，每次跑10K，當時激瘦20磅，面型由圓變尖，即傳出整容傳聞，佢話：「我都幾無奈，但又好開心，即係大家覺得我有成效。」

裕美去年被爆背住老公林恩浩（Jason）搭上黃子恆，最後變回單身，早前佢又被影到與台灣四眼男密會，裕美話當晚見過之後，大家就冇再見面。問到有冇機會發展？佢笑笑話難忍異地戀，佢話：「我同佢似朋友感覺多啲，不過每對戀人都係由朋友開始，你為我祈禱啦，我唔知呀，佢係圈外人，我唔太想選擇同行。」

裕美指身邊都有好多單身男、女，雖然想搞個極速約會，不過唔識搞，佢話：「我都等咗年幾，（前夫）冇聯絡都年幾，我叫自己唔好同異性單獨出街一年，0依家開咗關，我都期待緊，如果有都會去認識。」

另外，吳日言嘅老公Barry得第三名，吳日言話：「佢係一位業餘嘅跑步導師，平時我哋有一齊跑，佢話我係最難教，因為我成日發忟，永遠都冇進步，今日我跑咗K半好辛苦，唔知係咪因爲落大雨，一起步就搏命跑，加上又冇食嘢。」佢透露老公明年會參加全馬賽事。