又到聖誕，又到聖誕，又係破財嘅日子；費清呢輪開始周圍搜索啲聖誕禮物送畀女友，頭都痛埋；要用得其所，又唔係杯杯碟碟、收到放埋十年八載都唔用啲行貨。早幾日碰到美國智能手環品牌Fitbit 亞太區公關經理Diana BB話，送隻Fitbit咪得囉，好啱女仔用。

費清心諗，咪玩啦，聖誕啲咁浪漫氣氛，撐住枱角食燭光晚餐，送隻手環咁反高潮，真係搏鬧咩。點知眼前穿住Deep V晚裝、索到爆燈嘅Diana BB，拎起掛係佢心口嘅玫瑰金吊錘，笑笑口話，其實呢隻係智能運動手環Flex 2，一樣有自動運動追蹤功能，辨識行走、跑步、自行車、滑步機、有氧健身等運動，Check到消耗幾多卡路里。

Diana話，知道啲女仔又要實際，又要靚，所以同連卡佛合作推出一系列走時尚格調智能手環，包括Fitbit Blaze、Alta等；而Flex 2豪華系列除咗有吊錘，仲有手鐲，戴住去聖誕ball冇問題。價錢$788，又唔係貴喎。

女有着落，男有乜選擇？大昌行助理總經理Vincent話，男人梗係鍾意音響，依家發燒耳機大行其道，咪聖誕推出英國耳機品牌RHA全新旗艦型號耳機CL1。耳機賣點用到發燒動圈同陶瓷板混合單元設計，帶出錄音室原音，「用到陶瓷加阻抗做耳機，可以提升高頻泛音嘅音色純度，又可以將背景噪音降到最低，聽歌聽到背景靜如深海。」佢教路話，用到高阻抗嘅耳機，一定要配合耳擴嚟用，先夠力水推啲聲，否則得物無所用。

費清＃要生計，也要生活＃毋忘初衷