A股畀票據交易冰封搞到跪低之後，大家又驚股權質押同埋私募基金屆清盤線嘅兩大炸彈，呢啲都係A股自高位下跌近五成後，所衍生嘅問題。
換言之，A股升，問題就消失。不過，大股東抵押完股，借咗嘅錢已部份蒸發，最終中央有可能勒住內銀唔追call孖展住，頂一頂；至於私募基金屆清盤線，綜合傳聞，最終可能硬cut清盤線，不過又會引來贖回潮，除非又強硬地設定分階段贖回，或機構投資者暫時不得贖回呢啲膠招。即使能暫時止跌，資金流轉速度減慢，要炒上A股就要面對錢從何來嘅問題。你可以令A股唔跌，但以後想升都難。

殭屍股市本來未必有問題，如果企業基本因素良好，投資者長揸都得，不過，幾百億元市值而冇基本因素嘅A股就大有股在，所以噚日港股跌親都係漢能（566）豪抵押、豪炒上式玩法嘅細股。一批爛國企H股竟然變咗避風港，點解？因為佢哋升都冇升過，自然冇押股翻炒嘅前科，唔會爆煲。估值係地底泥，最多都係由佢地底泥落去，三分釘變成抗跌力，亦解釋到低殘H股開始唔跟A股跌。
除鋼鐵外，煤炭行業亦有中央大大力去產能扶持，中煤（1898）市賬率跌到0.4倍唔夠，但求中央幫到啲手，令佢係咁意扭虧都值回票價有餘，但圖表未轉強，可博，但限注買。

晉佳
https://www.facebook.com/advanceguy1/