拜得神多自有神庇佑，若然神明畀你願望成真，最緊要還神，而能力許可嘅話，仲可以還得重手啲！
由香港資源（2882）打造、地球上至大嘅純金黃大仙前日開光，以執行董事黃英豪同徐傳順為首嘅一班高層，專程上晒西樵山夢工場出席儀式，而因為四叔李兆基捐咗架流動中醫車出嚟，身為親家嘅Alex就要做多樣嘢，代四叔出席交車匙儀式，同埋帶華華睇吓隔籬佢有份捐建嘅地藏菩薩祠搞到咩進度！
篤信地藏菩薩嘅Alex話，地藏菩薩打救被打入六道入面下三道（畜牲道、餓鬼道同埋地獄道）嘅眾生，而佢「地獄未空誓不成佛」呢個望願喺佛教嚟講係無人夠佢大，所以佢嘅能力亦係最大，但如果要求地藏菩薩，係要先悔改，然後再幫佢弘揚佛法，而要悔自己嘅過錯，就可以念「佛頂尊勝陀羅尼咒」。

繞幢7個圈減罪孽

Alex話，佢自己都有啲心願同地藏菩薩許咗而又靈驗，所以，佢同幾個有心人就出少少力，起番間地藏菩薩祠，仲起埋一個「佛頂尊勝陀羅尼咒」幢（無錯，係幢唔係塔！）只要誠心合十順時針方向圍住個幢行七個圈，就可以減輕自己嘅罪孽。
呢間地藏菩薩祠，定咗喺8月8日開幕，Alex同幾個有心人已經整咗批電子念佛機、印埋經書同埋過咗膠嘅地藏菩薩肖象畀有緣人。
話時話，Alex雖則唔肯披露自己許過咩願，但憑佢嗰日係咁喺菩薩前話感恩個女子淇生咗個「慈姑椗」，唔使再講都明喇，至於隔籬黃大仙，香港資源班高層上完香後，香港資源嗰晚即刻出通告話噚日朝可以復牌……所以，舉頭三尺，真係有神明呢！

mailto:[email protected]