就快踏入新一年，到2018年1月亦係歐洲球員轉會市場重開嘅時候，如果同球會到季尾就約滿嘅球員，仲可以自由同其他球會傾，簽定合約等到夏天免轉費會費過檔，就算喺1月走人，通常轉會費都唔會太高。曼城主帥哥迪奧拿想簽阿仙奴嘅智利球星阿歷斯山齊士，唔想等半年咁耐，反正球會大把錢，據報將會開價5,000萬鎊（約5億港元），利誘阿仙奴放人。

山神同奧斯爾同阿仙奴都係剩返唔夠一年合約，球會同佢哋傾續約一直都冇進展，走人機會好大。如果等到季後佢哋先走人，兵工廠球會就一毫子都收唔返，曼城真係如報道指開出半億鎊買山神的話，真係非常吸引。但呢單交易最大難關始終係阿仙奴領隊雲格，佢始終堅持唔肯賣，就算將山神擺到季尾到時佢免費走人都係咁話。

--------------------
係你！打造星級球隊，征服各地聯賽！立即加入『BFB CHAMPIONS 2.0』！ http://bit.ly/2xrTKGM