香港富豪劉鑾雄同老婆甘比（陳凱韻）近年嚟好積極做慈善，諗唔到佢哋嘅大女秀樺都有秉承父母美德，只有10歲已識做生意，而且將賺到嘅錢全部捐去做善事，幫助有需要嘅人。

到底年紀輕輕嘅秀樺做緊乜嘢生意？原來喺今年放暑假期間，佢瘋狂迷上玩全球小朋友都瘋玩嘅史萊姆（Slime，港稱鬼口水，又名鼻涕膠、水晶泥），甘比話秀樺最高峰時期有過千塊Slime，到暑假完畢要修心讀書，甘比叫大女掉晒啲Slime，但秀樺認為太浪費，仲提議不如送出去。

不過，原來秀樺唔只鍾意玩，仲鍾意親手製作，所以秀樺喺媽咪陪同下買材料返屋企自製，而佢一啲都唔求其，好注重成品安全，因為巿面賣緊嘅Slime嘅原材料可能會用上硼砂，由於硼砂係一種化學成分，可以提高粘液嘅粘稠度，但含量超過標準有可能會危害健康，所以秀樺就冇用呢種材料。

秀樺做得好認真，設計埋個logo，又幫自己個「品牌」改名叫Chorus Slimes，設計同包裝都係秀樺出主意，由於Slime街價賣緊50至80蚊，而Chorus Slimes每樽只係賣28蚊，相對嚟講真係平好多同抵買。後來甘比喺皇室堡幫個女租咗部Slime售賣機，將啲Slime入落啲新樽仔度先至賣出去。

據知，楊千嬅、鄭秀文、容祖兒、陳奕迅、鍾楚紅等紅星好似都有幫襯買，o依家已經賣咗千幾樽出去，好好反應。秀樺仲喺Instagram幫Chorus Slimes開account，實行網上宣傳夾攻。入面有好多玩鬼口水嘅片，全部係秀樺自己拍，個account嘅所有嘢都係佢自己整上去，完全冇搵人幫手。

《蘋果》搵過甘比，佢話諗唔到個女會將興趣變咗一盤生意，而且做得有聲有色，仲係有錢賺，甘比話：「個女第一次自己一手一腳去做一盤生意，由買材料到包裝設計、拍片全部自己搞掂，我同老公都忍唔住要讚個女，而且佢將賺番嚟嘅錢捐番俾爸爸嘅慈善基金，好想跟爸爸一齊幫助有需要嘅人，真係好乖！佢好細個已經參加賣旗籌款，當時老公為咗支持佢，仲同埋個女一齊去街邊賣旗，令個女從細就培養出助人為快樂之本嘅心。」

精選娛聞，喺晒《娛果》
http://fb.com/appledailyent