當年今日
關於我們

YouTuber電影狂迷Hebe尋找港產片消失場景:唔好等拆咗至懷緬

蘋果日報 2020/11/06 00:00

HebeYouTuber王家衛重慶森林阿飛正傳黃亦彤

追開YouTube的讀者,近日可能會看過YouTuber黃亦彤(Hebe)拍的幾條短片,內容是追尋80、90年代經典港產片朝聖地,包括《賭聖》周星馳同三叔吳孟達墮樓的大廈、《逃學威龍2》的Adam Smith國際學校、《賭神2》高進住的地方、《國產凌凌漆》賴有為屋企同麗晶大賓館的原址所在,點擊平均都過10萬,最高一條《逃2》更達27萬。尋訪重點是抽絲剝繭的過程,恍如一套推理劇。
早前Hebe跟《蘋果》尋找王家衛《重慶森林》和《阿飛正傳》的足迹,今次行程Hebe帶記者去到中環睇鐘,這個位於舊中國銀行大廈停車場入口的大鐘大有來頭,它在王家衛《阿飛正傳》中「客串」過,同場有劉德華和張曼玉,經典對白是「你成日都話過埋今晚就冇事,咁你噚晚點過?」之後去到蘭桂坊,近公廁的位置旁邊,有一間便利店,原來就是《重慶森林》梁朝偉警員663簽簿位置,戲中梁朝偉先行過對面Midnight Express,約在快餐店打工的王菲過對面食飯,Hebe表示因為餐廳已經結業,所以要反覆看很多次,才找到這個場景。最後Hebe帶我們來到干德道和衛城道交界,由斜路行落去,就是《阿飛正傳》另一個場景,Hebe說︰「呢條斜路盡頭轉右之前,喺戲入面有個電話亭,其實好多電影迷都知道,嗰個電話亭係道具嚟,係冇存在過呢個電話亭。」劉德華就在這裏等張曼玉,而事實上如戲中所講一樣,該處有巴士可去到南華會,即張曼玉戲中工作的地方。
他接受訪問時講到這個系列,開始是覺得舊電影內重要場景,好可能就出現在你身邊,他說︰「自己都係港產片迷,受住阿哥影響,佢唔係圈中人,不過就買好多港產片返嚟,細個冇乜娛樂就一齊睇片,周星馳、梁朝偉,好多對白都入晒腦,同阿哥日常生活就係對戲。」作為一個YouTuber要找不同題材,引觀眾click入去欣賞,而類似題材居然未有同行試過做。Hebe話尋找的同時都可以保存一些即將消失的事物,拍攝地方可能你會行街經過,甚至在屋企附近見過︰「可能好多場景就喺你屋企附近,但你都冇留意過。睇完我啲片之後會話『哦!原來呢度拍嘅,我睇咗好多次。』勾起大家啲回憶,有啲電影嘅一啲景點,可能消失緊或者已經消失咗,我希望大家去關注去留意,唔好等到個場景真係冇咗喇、拆咗喇、重建咗喇先至嚟懷緬囉。」
Hebe自言沉迷周星馳早期作品,《逃學威龍》、《百變星君》、《龍過雞年》、《賭聖》等都如數家珍。他希望做的片夠大眾化,可以引起共鳴,目的是老少通殺。稍後的構思會有「古惑仔系列」及有代表性的香港電影。大學時期已經在電台任兼職,目前仍有主持新城電台節目,半個圈中人身份有助拍攝︰「娛樂圈有network,亦有電影朋友從事幕後工作,多謝阿哥呢個超級港產片同電影迷,細路仔冇乜娛樂,喺屋企就睇好多電影,入咗腦食飯就喺度對戲,我做咗周星馳,佢就做咗吳孟達。」
目前港片朝聖系列點擊不俗,平均都有10萬viewers,但拍之前有過一刻擔心,驚的是80、90年代的片,新世代人未必會識,亦都怕人不識周星馳。他說打開這道門之後,下一步希望推廣至本土化,關注一下重建區,觀塘會是下一目標,Hebe說︰「一啲樓拆緊,未必係電影場景,但都係一啲人嘅回憶,收到讀者觀眾inbox我,有好多互動,同提到一啲消失嘅地方,都想做。」
不少人都以為做YouTuber不需成本,其實花費的是時間同精力,Hebe話︰「本身電台工作都吃力,自己唔係好精剪接嘅人,我啲片冇乜效果,器材亦都好緊要,最近買咗航拍用嚟搵返《回魂夜》李生、李太跳樓嗰幢樓,想知係咪就係厚德邨德裕樓天台,後來發覺原來唔係。」每次朝聖流程都是先選電影,跟住翻看,從中找有價值拍攝地點,當然越少人講過,就越引人入勝,Google Maps是好幫手,但仍少不了一番推理︰「例如前一幕是沙田開工,下一幕係沙田就好大機會,真係搵唔到就打電話問影圈朋友,最後當然係實地考證。《回魂夜》就要多謝區議員同街坊認證。」
Hebe話小時候喜歡打機,所以初初晉身YouTuber行列時,當時電競風好熱,順理成章拍的片都跟電競有關,他笑說︰「不過電競潮來又如風去又如風。」近日大熱的片,他直言莫過於政治議題分析,好似蕭若元、劉世良跟沈旭暉的片都好受歡迎,他說︰「佢哋一日做幾條片,幾條片都過到10萬viewers,相信同社會氣氛同政治環境(有關),令好多觀眾都關心呢類題材。好明顯時序要數到舊年反送中時嘅5月開始,好多政治YouTuber應運而生。而家好多片內容導向,就咁坐喺度講一啲政治分析就已經好多人睇,反而一啲比較有製作嘅未必打到入熱門影片行列。之前受歡迎的是生活化題材,好似美容、煮食、旅遊同開箱都有好多捧場客。」講到YouTuber收入微薄,又有綠、黃、紅標分別,每10萬viewers大概可以收到1,000蚊,如果全職做,計計數要做到20條過10萬的片,才可以有較穩定收入,重點更是你如何放置廣告位。身為YouTuber最不想當然就是被人「quit」或者「delete」。Hebe話課金收看一直都有,亦有直播donate同會員制,有一些女KOL以性感照作招徠,課金後就可以入她們的平台看KOL的性感照。
採訪:何永寧
攝影:仇志德
攝影:馮嘉銘
-----------------------------
《蘋果》英文版免費試睇:了解更多
英文版已登錄《蘋果》App,立即下載/ 更新iOS / Android
-----------------------------
支持蘋果深度報道,深入社區,踢爆權貴,即Like蘋果專題及調查組FB專頁