理大早前安排15名修讀食品科學嘅學生，去詠藜園學做月餅，又要學習品質監控同推銷，據知學生曾經試食超過100個月餅，以測試成份比例同味道係咪適合，最終製成三款獨一無二嘅健康月餅，佢哋仲要親身去內地一間受委託嘅月餅廠監督製作過程，慎防任何差錯。
唔少人食咗都大讚，理大本來訂製8,000個，但好快賣晒，後來加碼至10,000個，一樣售罄。八方聽聞大劉都係粉絲，加上想做善事，結果搵嚟高層人員向詠藜園同理大訂購500盒，諗住送去慈善團體，點知對方竟然話咁多唔得，大劉職員讓步話買200個，一樣唔夠貨，最後只買到20盒咋，唔知大劉有冇留番一盒畀自己慢慢嘆？