入行已經超過50年嘅資深歌手鄭錦昌，今日現身觀塘為佢月底舉行嘅巡迴告別演唱會出席記者會。今次演唱會共開六場，由8月28號開始喺屯門、元朗、荃灣同埋旺角麥花臣場館舉行。

75歲嘅昌哥，今日喺記者會上精神奕奕，佢話選擇去屯門同元朗開騷係為咗歌迷：「自己啲歌迷都同我一樣係上咗年紀，唔想佢哋舟車勞頓，於是我特登去佢哋嘅地方拜訪。」

點解要退休？昌哥話：「其實呢幾年自己喺馬來西亞都係半退休生活，之前喺吉隆坡開完告別演唱會，於是今次就想返嚟香港開埋，之後就可以真真正正咁榮休。」

有冇唔捨得？昌哥話：「都會有㗎，但唔捨得都要捨得，而且我今次唔係封咪，只係唔再舉行演唱會，日後有啲咩慈善演出用得著我嘅我一定可以幫手。」今次妹妹同外甥等總共十幾個人都專程來港支持。

講到退休後嘅生活，昌哥表示：「原本我喺馬來西亞買咗撻地，打算種菜養雞整魚塘，不過因為地方太過偏僻，朋友話擔心我『毆』臭咗都冇人知，於是就打消呢個念頭，留番市區生活。」唱哥話平日鍾意睇吓電視聽吓歌：「我幾廿年都未做過一日運動，又唔賭錢，有得聽下歌就已經好開心。」