色即是「胸」、「胸」即是色？「正義聯盟」兼「撐警大聯盟」召集人李偲嫣，似乎對色情別有一番體會，最近因為目「胸」一切，接連挑「逗」……Sorry，打錯，係挑「機」熱血公民黃洋達至真。
繼早前去到《熱血時報》位於九龍灣辦公室示威，抗議對方喺反水貨客行動中欺凌弱小後，偲嫣BB噚日再度帶隊隔空狙擊皇上，着住印住好pure白雪公主圖案Tee嘅佢同約廿名盟友，上午去到電影、報刊及物品管理辦事處，舉報熱血公民出版嘅《熱血少年周刊》同《黨娘》內容色情不雅，仲話自己睇晒咁多期，好似《黨娘》咁，入面從政女性好後生又激進，會「無端端着三點式」、「無端端遮住嗰兩點」，係毒性洗腦侵害青年人喎。

質疑抹黑從政女性

偲嫣BB叫處方睇緊啲，檢查有關刊物係咪要包膠袋：「佢係刻意賣弄一啲……唔一定要露點，而係誇張胸部，個個女性人物喺本書度都露內褲，講唔好聽啲係『趷起個籮柚』……說話有粗口。」佢又質疑漫畫抹黑從政嘅女性，因為故事中任何女性都係不擇手段，又話周刊針對警隊，塑造所有警察都係「黑警」。
八方問過皇上點睇，佢話對方咁做無非係要加重《熱血》嘅出版壓力啫，聲言堅持出版，重申一直好小心把持尺度。佢仲話《黨娘》係一本娘化作品，日本漫畫好常見，佢哋將社運政黨畫為女角，係就係有影射現實中嘅政黨政客，但如果將真人同漫畫對照，怕且係美化咗喎。至於警察係咪「黑警」，佢認為自有公論，同埋呢個唔係處方監管範圍，唔知佢投訴乜嘢喎。

李八方
mailto:[email protected]