魏駿傑與細他逾廿載嘅內地少妻張利華傳婚變，更有報道圖文並茂指女方背夫約會前單車手鄧宏業。魏駿傑接受《蘋果》電話訪問時表示非常信任太太，更指：「如果有發生嗰啲事，都俾人影到啦！香港專業狗仔隊神通廣大，你開房死梗㗎！喺我立場我選擇相信太太，可能會同佢講番。」

魏駿傑續道:「佢(張利華)後生過我20歲，同佢講番你要成熟得快啲，要知道你老公喺香港雖然冇拍嘢，但都係呢行，都係知名人士，你出到去好多人都知，要注意番自己行為舉止，我話唔可以隨街吐痰，個個市民都做㗎啦。」

言下之意，即是太太有隨地吐痰？魏駿傑即謂:「唔係，我舉個例子，個個市民都應該做，加多樣嘢我係公眾人物，出到係蝕底啲，其他人吐痰冇事㗎，魏駿傑吐痰就會俾人話。」