正當大家每晚睇緊《溏心風暴3》入面，「火姐」李司棋成日講：「我真係火都嚟！」嘅時間，你會唔會好掛住之前嘅「管家仔」林峯呢！

今日就係林峯嘅38歲生日喇！Happy Birthday to you......

離開大台後，林峯就返咗大陸拍劇，一劇接一劇，真係忙到氣都有得透，就係咁，今年6月就傳過佢同「好愛、好愛、好愛、好愛、好愛、好愛、好愛」嘅吳千語分手，五年情玩完，當時仲話吳千語識咗一個同廈門闊少林峯有番咁上下富商男友，但係兩位當事人回覆《蘋果》時，就話報道冇中生有( 新聞連結： http://bit.ly/2kaxlIJ )。另一邊廂，《蘋果》就收到風，話其實佢哋依然愛得痴纏，千語BB仲準備明年就嫁俾38歲嘅林峯㖭！(新聞連結： http://bit.ly/2BewwcQ )

咦！林峯今日就38歲生日，咁佢係咪準備同千語BB結婚呢，相信大家都要等主人家公佈先知，到時「小鳳姐」先出場都未遲。雖然生日，但林峯就冇得休息，仲喺大陸拍緊劇，噚日佢就喺微博貼圖，見到一向「玉樹臨風」嘅林峯，竟然貼咗一張光頭賣萌相，留言：「冷，大雪，還是要多穿一點」，見到佢睜大雙眼，O晒嘴咁話俾大家知佢好凍，真係好可愛，但對比佢喺香港時，好Chok咁影相，真係完全唔同，唔知大家又鍾意邊個林峯多啲呢！？

至於千語BB噚日就喺fb貼咗一張相，仲問大家：「我用邊隻顏色染髮好呢！」，唔知係咪準備一個新Look，同峯峯慶祝生日呢？

更多娛聞，喺晒《娛果》
http://fb.com/appledailyent