【韓流】Gary婚後幸福肥?智孝跪地求勝出《RM》任務
Running Man宋智孝Gary
韓國綜藝節目《Running Man》(RM)上周完成「Global Race特輯」,以劉在錫、池錫辰、李光洙、楊世燦及全昭旻體驗全世界最恐怖鬼屋作結,今日播出嘅節目就開始新特輯「1%的某個地方」,最新一集有韓劇《雲畫的月光》「肥妹仔公主」鄭慧星任嘉賓,9位成員要喺日本東京完成任務。
《RM》製作組率先公開預告相,只見與池錫辰及楊世燦一組嘅宋智孝,為咗完成任務東奔西跑,一向有「ACE」稱號嘅智孝亦唔會因為自己係女仔而要求休息一陣先繼續出發,相當敬業。而預告相中智孝更唔理自己身處東京市中心,就直接跪喺地下,雙手合十好似祈禱咁,緊張嘅神情引起觀眾關注及好奇,唔知最終智孝三人可唔可以完成任務呢?
另外,《RM》嘅前成員Gary早前突然宣佈做人夫,粉絲雖然大感震驚但都送上祝福。Gary婚後甚少自己公開近況,不過之前分別去夏威夷、日本旅行時就被粉絲捕獲。日前Gary就畀好友出賣,事關其好友將佢身處工作室嘅短片放上Instagram,只見Gary一臉幸福咁食緊嘢,身材略顯發福。
《RM》今日播出最新一集,智孝為完成任務更跪地祈求有好結果
好友日前公開Gary近況,婚後Gary似乎相當幸福,身材略顯發福