余思敏今日喺荃灣出席樂施會「賽馬會『世界小小公民』教育計劃」啟動禮，介紹三本為小朋友而設嘅教育繪本。余思敏話平日都堅持同仔女講睡前故事：「有時要出街食飯，都堅持會講埋先出去。佢哋開始大個，有時都會點名叫Daddy（鄭中基）講，不過囡囡都會問我介唔介意，好sweet。」余思敏又笑指仔女都好鍾意黐住爸爸，晚晚都問爸爸返唔返嚟食飯。

今年嘅聖誕會點慶祝，余思敏話都盡量會留喺屋企：「佢又要忙住綵排演唱會，日頭就抽時間陪吓仔女。有時我都會帶佢哋探班，因為囡囡好鍾意唱歌，仲話想做歌星，不過我同佢講做藝人，背後有好多付出㗎，佢都有興趣，但細佬就搞搞震多，冇乜表演慾。」

鄭中基喺明年開騷，余思敏話自己學吓煲湯畀老公以示支持：「我嘅廚藝真係唔及佢，平時多數係佢入廚。早排有人影咗佢去買公仔麵，因為佢返嚟都好夜，咁真係食麵最快，佢仲叫我同大家講已經食晒喇！」

精選娛聞，喺晒《娛果》
http://fb.com/appledailyent