承接之前嘅《製作人們》講到白承燦(金秀賢飾)因為卓藝珍(孔孝真飾)向自己傾心事而覺得好開心，令到佢哋關係更進一步。

當中SBS人氣節目《RunningMan》嘅一眾主持亦「客串」咗幾秒鐘，李光洙更有特寫鏡頭。白承燦（金秀賢飾）加入《兩天一夜》後首次播出節目當晚，白承燦家人就坐埋一齊睇首播，不過白承燦屋企人就覺得節目好無聊，而當畫面播出白承燦為Cindy（IU飾）綁鞋帶一幕時，白承燦屋企人就反應激動，表示唔鍾意白承燦做啲咁卑微嘅工作。而《兩天一夜》因字幕出錯，作為負責人嘅羅俊模（車太鉉飾）就非常擔心，而卓藝珍（孔孝真飾）就安慰佢。

二人一邊飲酒一邊閒聊時，卓藝珍就發現羅俊模講大話，發現羅俊模根本冇去相睇，目前亦冇有興趣要發展嘅對象，於是卓藝珍就覺得羅俊模早已知自己鍾意佢嘅事，於是然後扯火嬲羅俊模扮唔知嘅行為。

到夜晚收工時，白承燦見到卓藝珍即表現興奮，得知卓藝珍身上冇咩錢時，白承燦就主動請卓藝珍去食烤肉，卓藝珍提到自己鐘意羅俊模係因為覺得二人心靈相通，而白承燦亦話自己鍾意初戀係因為初戀對象生得靚。之後白承燦就讚卓藝珍：「前輩你都好靚。」卓藝珍即冧到甜笑，仲餵白承燦食生菜包，白承燦亦一臉受落。

一直喺屋企等緊卓藝珍嘅羅俊模，就見到卓藝珍同白承燦一齊返嚟，羅俊模即醋意起，而卓藝珍就發火表示想搬走，仲為咗避羅俊模而去電視台瞓。