由27名高考、會考狀元同傑出學生組成嘅狀元團，上星期三結束行程由山東返港，大部份狀元都係第一次踏足山東，大家都好驚訝內地發展咁迅速。不過，有位會考九優女狀元林思希對大陸印象麻麻，佢話之前聽到好多關於內地食品嘅衞生問題，已經唔多鍾意內地，今次仲見到內地人冇乜公民意識，吓吓唔排隊之餘去廁所又唔閂門，仲覺得內地四圍可見嘅口號同標語橫額好騎呢好難頂㖭，林同學話短時間內都唔會再返內地玩嘞。

呢個狀元團仲發生咗一段小插曲，有兩位狀元喺當地一時心急掛住跟番上帶團導遊，匆忙間買咗總共成500蚊嘅雕刻圖章，但嗰啲圖章本身加埋都只係值百零蚊啫。其中一個被騙狀元話今次當買個教訓，第時返大陸傾生意簽合同時會睇清睇楚先。另一個受害者Stephen覺得自己蠢咗好唔開心，不過佢經過同行狀元安慰之後好快就開朗番。
狀元團係康泰旅行社連續第五年舉辦，佢哋一連六日遊覽山東名勝大明湖、泰山、孔廟等，又到山東大學參加講座同探訪濟南巿嘅兒童福利院，真係行程緊迫，來回各地坐車嘅時間都已經去咗大半，睇怕佢哋都唔慌玩得盡興。