早前有報道指天王郭富城同女友方媛拍拖前曾秘戀方皓玟，今日方皓玟去到商台宣傳新碟，被問到有冇跟城城拍拖，佢就哈哈大笑話：「睇完篇報道我真係覺得自己創作力唔夠，啲名真係改得好絕核，令我笑足三日。」

佢覺得天王都要食飯、去廁所同拍拖，大家不如畀空間對方，問到佢係咪傾慕城城？佢話：「全香港人都傾慕佢啦，對你愛不完。」佢指跟城城有共同朋友，平時會一齊食飯好正常。

相隔4年再推出專輯，首批特別版會附送500隻公仔，當中有50隻係黑白珍藏版，跟住就要忙住籌備明年4月，喺麥花臣場館舉行演唱會，佢希望喺歌曲中舒緩香港人壓力同怨氣，任何政治同敏感話題都會照寫。

問到佢會否擔心步張敬軒後塵被狙擊，影響喺內地發展？佢話：「軒仔有乜需要擔心？我冇賺過佢一蚊，唔擔心，擔咩擔？畀錢我賺先再擔。」佢覺得其實香港係可以足夠支持自己，唔需要外求，大家應該諗點撐自己人。