上星期六德甲拜仁慕尼黑喺主場憑班捷文柏華特嘅世界波，加埋羅拔利雲度夫斯基建功，以2:1擊敗柏林聯，繼續高踞德甲榜首。當中「羅拔仔」開季九場德甲場場有波入，打破15/16年球季仲喺多蒙特嘅奧巴美揚，創下嘅連續八輪德甲入波紀錄；羅拔仔今次亦係連續13場為拜仁披甲建功，認真威水。

後防傷兵滿營嘅拜仁，今場要派出18歲加拿大中場艾方素戴維斯串演左閘，但佢哋喺13分鐘已經藉柏華特喺禁區頂轟入一球世界波，先開紀錄。到53分鐘，羅拔仔終於搵到機會，佢當時喺中路推進，原本諗住橫傳畀隊友，點知個波省到對手彈番落自己腳下，羅拔仔即刻起腳，輕鬆攞到佢今季第13球德甲入波。

今年五大聯賽入波最多

連埋呢球，羅拔仔由踏入2019年起已經入咗25球聯賽入波，冠絕歐洲五大聯賽，仲勁過巴塞隆拿嘅美斯（見附表）。難得呢位波蘭射手仍然相當謙虛：「可以打破紀錄梗係開心，但我𠵱家只會專注練波同足球。」

羅拔仔已經連續喺13場比賽為拜仁入波，差2場就可以追平「轟炸機」武勒喺1969/70年球季，連續15場為拜仁入波嘅紀錄。不過，雖然羅拔仔狀態大勇，但拜仁教練尼高高華仲係唔太滿意球隊近期嘅表現：「我知我哋可以再做得好啲。如果睇番近幾場比賽，我哋場場都俾人逼得好緊，最後都係贏得一球，所以一定要改善。」