騎師控制體重係一件好苦惱嘅事，而且重磅騎師一向較為蝕底，佢哋往往因為磅位問題，座騎選擇相對較少，冇輕磅騎師咁受歡迎。

好似有馬場Ironman之稱嘅愛爾蘭籍騎師郭能，就正因本身係重磅騎師一族，成日都要喼住做運動，控制體重。

歷來郭能陣上有好多精彩演繹，尤其鬥後勁方面，Ironman嗰種硬朗騎法，亦令人睇到拍爛手掌。姚本輝馬房「春盈」就曾經喺郭能胯下開齋兼連捷。

「春盈」加分升上三班後，因負輕磅出賽，令Ironman冇得再騎。上賽已換同級而可騎輕磅馬的巴度執韁，表現一樣交出水準，只負於應屆百萬挑戰盃狀元「好益善」少許做阿二，證明「春盈」升班未遇阻力，而且表現好開續好。

周三（7日）晚此駒再上征途，跑首本戲谷草1200米，評116磅出賽，郭能再一次因造唔到磅無緣壓陣，結果益咗莫雷拉。

其實「春盈」最近試閘已由雷神過檔，並將夥拍他出賽，Ironman惟有等下次故劍重逢了！