梁氏以1,800萬元換入長實(1113)馬鞍山星漣海4房單位，梁太最擔心的漏水問題有無發生?資深驗樓師賴達明「明哥」出動，打開廚房鋅盆及洗手盤櫃底，條條喉貼住「CHECKED」標籤，是否代表無事?推開客廳大窗聽到 「姨卡嚓！」 ，閂都閂唔埋，好牙煙，一屋4房幾乎房房都見頂天立地的收水裂紋，最終梁太又收不收貨?

明哥驗收梁太的單位，位於2A座中層4房單位，實用1,154方呎。入屋前，不想上鏡的梁生已提出客廳個窗有問題。疑似有問題大窗位於客廳露台旁，明哥上前一推，發出「姨呀…姨呀…姨卡嚓！」的聲音，如何推拉也未能將上揭式的大窗關上，明哥指：「窗鉸壞咗㗎啦，完全click住咗，呢啲係金屬磨擦聲音，閂都閂唔到，個窗有好大問題，閂唔埋，夾硬閂，驚整爛隻窗。」在場有長實收樓部的職員，為免打風扯開窗，他決定夾硬閂埋，並表示會著令同事跟進。

窗有問題，油漆亦差，凹凸不平如沙眼、眼淚隨處可見，由主人房、走廊到細房更發現至少5條由天花至地板的特長收水裂紋，其中走廊的收水裂紋相信位處主力牆與磚牆之間，因溫差而出現。細房那條特長收水裂紋更呈「S」形，其中一處有輕微空鼓的情況。事實上，主人房亦發現2處批盪空鼓，其中一個空鼓面積約1平方呎。

業主最擔心新樓漏水，明哥打開廚房及廁所櫃底，喉管貼滿「CHECKED」標籤，據悉，今個樓盤個個單位也是如此，嚴陣以待，來去水都沒有問題。不過主人房套廁浴缸牆身的鋪石卻有幾個窿，其中一處更崩裂，必須修補以免滲水落缸底，後患無窮。主人套廁馬桶水箱又無鎖穩牆身，徒手推得動，明哥擔心經常移動，有機會影響來水喉的耐用。

工人房浴室馬桶邊地磚有少許空心，但明哥建議唔整好過整，事關地台已做防水層，一旦起磚鑿穿防水層，得不償失。不過旁邊洗手盆喉管與地磚接駁位有窿罅，有滲水風險，建議業主要求發展商執修並填補防水英泥。浴屏門設計亦存在缺憾，明哥閂埋實地試水，開得幾秒，已見門邊滲水，滴出一小灘。

明哥總結：「全屋14項交樓工種，發現最大問題是油漆，最少有5條收水裂紋，亦好多瑕疵，扣分最多；其次是窗，大廳個窗閂唔到；好多潔具比較鬆，例如浴屏門，批盪有空鼓、石材刮花、鋪磚有窿隙……比較好是假天花、欄杆、來去水，要讚無漏水。單位總分85分。」梁太聽到分數後表示：「最驚的漏水問題，就無，咁就OK，好開心、安樂晒！」

另一名資深驗樓師詹濟南「詹sir」則驗收另一個星漣海單位，為3B座中層4房戶，實用1,222方呎，業主花約2,000萬元買入。他認為，單位油漆粗糙、「真係唔得」，廳房牆身天花都有很多不平滑地方，例如起釘。露台有一塊空心磚，且近欄杆地板出現曾被酸性液體侵蝕的痕跡。

近廳套房有一處地台傾斜，相連套廁浴缸擺歪，反映手工問題，但純粹視覺影響，不會漏水。全屋廚廁來去水喉同樣貼有「CHECKED」標籤，已顯示驗過才交樓，來去水沒有出現滲漏。不過門項工種扣一半分，是眾項目中扣分最多，除了有一道細房門彎曲，工人房浴屏門閂唔埋兼會滲水所致。由於單位面積大，據其評分準則，系數為0.63，令單位總分達到86分。