當年今日
關於我們

體壇拾趣:跳遠王子今世大爭牌

蘋果日報 2015/07/12 00:00


跳遠王子陳銘泰近期Fit到爆,兩個禮拜前跳出7米83新港績,噚日喺南韓光州出戰世大運男子跳遠初賽,又造出7米79。初賽只有三跳,帶傷上陣嘅阿泰第一跳7米61,第二跳雖然失敗,但最後一擊就跳出7米79,以總成績第二殺入今日香港時間4:50pm展開嘅決賽。不過,幾位跳到八米嘅歐洲好手都隱藏實力,阿泰就話會將目標放喺刷新港績:「決賽前三跳會盡力打破香港紀錄,之後先會去諗獎牌,希望借助世大運嘅氣氛,有所突破。」阿泰留力備戰跳遠決賽,港隊噚日就由兩位400米猛將陳嘉駿、梁景雄客串,加埋李律言同蔡浩昇出戰4x100米接力初賽。四子最終跑出41秒05,因美國跌棒,港隊最後喺六隊中排第五,無緣決賽。