Lancôme賴皮遲遲不回覆，阿詩今日日開騷前受訪，表明已放棄追究。至於補償，阿詩表示:「其實唔可以話係補償囉，其實係一個履行自己合作嘅承諾。」

阿詩自言:「其實一個禮拜前，都已經冇再去追問，你都知佢哋冇意慾去俾一個答覆嘅時候，唔想去嘥嗰個力，唔想俾佢消耗我哋嘅力。」那不就是任其不了了之？「其實今日都係有個回應(阿詩指自己)，話俾大家聽，遇上呢個不了了之嘅態度時，我哋係唔應該滯留呢個位，俾佢磨滅嗰樣嘢，反而用我哋嘅方法去回應返，所以今日其實係一種回應。」

至於林榮基開記招說出真相，她稱:「林榮基先生，我個人嚟講非常感謝佢，香港人喺呢個時間好需要一個咁勇敢嘅人，企出嚟為香港人發聲，應該係話為自己發聲。我唔敢去比較係咪同佢一樣，我諗我哋有一個共同信念，係為自己、為呢個地方去發聲，當越嚟越多白色恐怖，越嚟越多人選擇去退縮、唔再相信我哋做自己嘅時候，林榮基先生就示範咗，其實一個人可以牽動到大家嘅意志，我希望我都可以有同樣嘅效果，我都係撐呢個地方，撐番香港人。」

至於今次個騷用幾多錢去搞？阿詩稱:「其實唔係真係好多錢，我諗幾萬蚊以內，因為好多人，其他單位好幫手，大家其實唔使太擔心我……不過要賣番個身俾佢哋，因為碌咗好多卡(人情)」。」封路是否要申請？「其實我都喺個舖入面，大家行街，其實都冇得申請嘅，咁，但係我都相信香港人嘅質素同秩序。」