網民抗議警方執法有問題，自發喺報章賣「警字兩個口」廣告兼上街遊行，設計呢幅「警字兩個口」海報嘅Julius係理大設計系二年級學生，佢同八方講，諗得出呢個意念多得警方，「聽完一哥話網民藏有淫照都犯法，又亂咁拉鍾亦天，即刻嬲到爆咗呢個idea出嚟，平時度嘢都冇咁快。」
發起遊行嘅網民「L」君喺網上公開徵求海報設計，共有9人提供11個設計，經網上公投，Julius作品以輕微較高票數當選，佢話由於「L」希望海報可以做埋遊行標語，所以構思時主題要清晰、明確。對於有網民批評其設計，認為用粗口表達不滿更直接，Julius不以為然，「粗口只係發洩不滿，警字兩個口有思考空間，諷刺效果仲大。」

Julius話平日上堂，老師都教佢哋有機會要用設計幫社會做啲嘢，今次設計海報正好學以致用，「我只係出少少力，證明網民唔係烏合之眾，希望警方唔好再貶低網民。」至於發起遊行嘅「L」，透露好多網民認數，已籌夠錢支付2月10號賣廣告費用，網民唔使再入數，餘款約5,000蚊會捐畀紅十字會國內賑災，佢功成身退，專心溫書應付會考。