韓劇《愛上Pinocchio》李鍾碩自從拍完劇集後，一直處於休息狀態，甚少公開露面，但係佢喺韓國嘅人氣就有增無減，因為佢同《愛上Pinocchio》嘅女主角朴信惠早前傳出緋聞，不過兩人就話只係好朋友關係，並非戀人，而日前朴信惠亦展開一個月悠長假期，並到歐洲旅行，當大家以為李鍾碩有機會秘密同行之際，原來李鍾碩就未有同行。

而李鍾碩大前日(19號)終於破關露面，佢仲好有心，驚喜現身好友金宇彬個粉絲見面會，兩人喺現場大玩「HEHE」，又拖又攬又摸大髀，搞到全場粉絲都哄動。而李鍾碩露完會，噚晚亦終於喺Instagram上載新照，由於佢有成三個星期冇更新過IG，所以令到好多粉絲都好擔心佢，李鍾碩亦似乎明白到粉絲嘅心意，所以即時上載新照慰粉絲，亦都抵死留言話自己未死得，寫道：「總係會出現一啲連我都唔太清楚嘅悲傷事情..哈哈，就算咁樣，都係要發，生存報告!!」

粉絲見到佢張新相後，除了大讚佢依然靚仔外，亦都戥佢擔心，因為粉絲覺得佢瘦咗好多，亦都擔心佢身邊發生一啲唔開心嘅事影響佢心情。而李鍾碩下個月8號就會到上海舉行粉絲見面會。