【李八方online】林鄭班子9男女齊放假 劉江華由聖誕放到新年
蘋果日報 2019/12/29 19:18
劉江華李八方ONLINE
人人都想放假㗎啦，唔使返工hea吓hea吓。之不過喺林鄭口中嘅「動亂」時刻，竟然又有大批高官可以放聖誕同新年長假喎，莫非都係好信任林鄭一定可以搞得掂？
翻查20號同27號兩份憲報，發現有9位司局長喺呢個佳節放假鬆一鬆，其中財政司司長陳茂波係由聖誕前嘅20號放到30號、即係聽日，但作為周日「鍵盤戰士」嘅佢，長假中不忘發blog，今日都有發表網誌，好政治正確咁鬧暴徒以「逆我者亡」原始暴力方式恐嚇小市民。
至於局長方面，最疏乎可能係民政事務局局長劉江華，憲報顯示佢由12月19號放假至1月2號，即係連放15日至2020年先至返工，乜而家唔係歸咎年輕人搞出反修例風波咩，乜主責青年事務嘅劉江華咁瀟灑？政制及內地事務局局長聶德權都唔執輸，12月27號起連放9日至1月4號，明年要搞立法會選舉，可能上充足電等有DQ潮再被插時都捱得住。創科局局長楊偉雄同財庫局局長劉怡翔都係過埋年先返工，但佢哋假期相對短，前者12月27號放到1月2號，後者12月30號放到1月1號，但查實佢哋有冇返工，市民都唔太留意到。
環境局局長黃錦星就啱啱喺23至25號放咗假；運房局局長陳帆都係23號放假，但就放到30號。勞福局局長羅致光就平安夜收爐至28號；食衞局局長陳肇始就26號放到30號。
問責官員年假查實有22日；歸納所見，30號有7位高官都放假，林鄭就以身作則，假期繼續work，一打呔就興奮嘅政務司司長張建宗又點敢喺阿姐唔放假時去玩？至於律政司司長鄭若驊喇喎，之前受傷都休養咗一段長時間，早前仲獲中共國家主席習近平慰問打氣，鬥志旺盛點使放假？
-----------------------------
民陣元旦大遊行