有時真不明白，這世代的小孩到底幹甚麼？像好端端一頓飯，明明有菜有肉香噴噴，他硬是拉長了臉不肯吃，又或含在嘴裏不肯吞，總之搞了半天，都吃不到兩啖飯。

我是金域假日酒店龍苑的張偉彬，說起來也慚愧，我當大廚，但我家偏偏就有這樣的一個小孩。他是我五歲的兒子，個子小小、皮黃骨瘦，每天吃飯都要像麻鷹捉雞仔一樣，左右折騰一輪。我試過諗新意，好似炒京都骨、咕嚕肉等濃香的餸菜引他，但他只吮了茄汁就把肉全吐出來，激死我。我試過又氹又哎又鬧又嚇，連卡通人物都扮埋，但這小馬騮，抿着嘴，硬是不吃就不吃，我也拿他沒辦法。最後我動之以情跟他說：「爸爸做廚師㗎！個個好似你咁唔食嘢，爸爸冇嘢做㗎嘞！」他聽了，扮一個鬼臉，然後連隨彈起身，逃之夭夭！吹到我啤一聲。

回想我做細路哥，哪有這樣荒謬的事情。童年的我在粉嶺長大，算是半個鄉下仔，爸爸本是菜農，後來在火車站附近開士多，一家人最開心的時刻，就是每天的那頓晚飯。母親在士多開張小小的摺枱，父親入廚煮幾味，滾個湯、炒碟菜、蒸肉餅。嘩！六兄弟姊妹個個吃到耳仔郁！我最記得每逢過年過節，屋企都會吃盆菜，豬皮、蘿蔔、門鱔乾、炆豬肉……真係唔搶都冇得食。

我因為為食，所以十八歲就入酒樓學師。我們鄉村人，比城市人淳樸，只知一味做，也不知甚麼叫做搵笨。師兄弟一齊洗地，人家個個爭着揸水喉，我卻傻更更的揸掃把。後來才知道，揸水喉唔使用力，亂淝一通就可以。揸掃把，卻要出盡氣力掃，才可把垃圾及污迹洗乾淨。不過做事抵得諗，原來最後有着數，師傅見我做得，甚麼也給我做，執碼、淥粉麵，到埋爐揸鑊剷炒兩炒，他都讓我來。我拿着鑊，人搖我又搖、人兜我又兜，落場就埋爐位勤力練習，慢慢學到了不少炒菜的技巧。

87年，朋友介紹我去沙田利苑做鑊尾，利苑話晒大酒家，我求之不得去上工。那時利苑的總廚是光叔，最鍾意唔聲唔聲扮客叫新人炒菜，有一次我在廚房接到柯打，要炒一碟乾炒牛河，我唔識偷懶，出盡力去炒，炒到河粉條條有豉油、條條分明。後來經理入嚟同我講，話大廚食完，冇抄你牌，算你過關嘞！我才知道，那碟乾炒牛河，原來是考牌。利苑一粒鐘，勝你一年功。我在利苑一年多，晚晚黃昏五點開始就埋爐炒餸，一直炒到九點十點，功夫就在不知不覺間增進起來。


今天，我已是酒店中菜部第二隻鑊，鮑參翅肚、珍饈百味烹過無數，幾十圍酒席我都應付自如，卻料不到，栽在一個五歲小靈精身上。但我沒有放棄，細路仔始終鍾意食香口嘢，我用惹味豉油，加蒜茸、葱段、薑片爆香海中蝦，熱辣辣、香噴噴。我希望今次他吮了蝦殼的豉油後，會同我講一聲：爸爸，我想食蝦！我想食豉油蝦！

大廚Profile
張偉彬，寶安人。82年入行，在大埔大元酒家做學徒，87年加入利苑由尾鑊做起。89年乘酒店中菜的浪潮加盟金域假日酒店中菜廳，一做十八年，並擔任酒店龍苑的第二把手。

（原文刊於2007年603期《飲食男女》）

立即免費下載《飲食男女》App ： http://onelink.to/etwapp
《飲食男女》網站 ： http://etw.hk