早排香港政府就話要研究方法打擊炒黃牛飛，不過講嚟講去都係得把口，人哋日職就開始試行門票全面電子化，杜絕炒賣門票嘅情況，呢啲咪真係做嘢囉！

有去過日本睇波嘅朋友都應該知道，當地嘅門票除咗實體飛之外，近年亦已經可以用手機嘅QR Code同埋「nanaco Card」代替，而場內嘅消費項目亦都開始電子化。喺上星期大阪飛腳主場對長崎成功丸嘅最後一輪日職比賽入面，飛腳嘅吹田球場就試行咗一款新式嘅電子門票，令球迷有更方便嘅觀戰體驗，仲得到唔錯嘅評價㖭。

喺當日嘅比賽入面，所有持實體門票入場嘅球迷都可以免費獲得一條智能手帶，球迷入場嗰陣只需要將手帶掃過閘口嘅感應器就可以入場，大大加快咗入場嘅時間，而且亦唔會再因為雙手要拎住食物或者拖住小朋友而拎唔到門票或者手機出嚟；如果要暫時離開球場再入場嗰陣亦都唔需要好似以前咁扱個「豬仔印」喺手，非常方便。

更重要嘅一點係，門票電子化可以限制每位購票人士嘅購票數目，由於智能手帶設有小額交易功能，因此亦都唔能夠隨意轉讓，大大減低門票炒賣嘅可能性，日職賽會仲計劃喺2020年全面推行門票電子化，到時只要有一條智能手帶，去睇波就唔需要再帶現金喇。
--------------------
新球季，新陣容！利物浦 FC 18-19季球星進駐《BFB》！立即帶領紅軍，踏上登頂之路！ http://bit.ly/2oQObi1
--------------------
《體蘋果》陪你睇波講波
https://www.fb.com/appledailysports