《蘋果日報》是周潤發每日必讀的報刊之一,他的習慣是先看A叠的時事新聞,然後再看娛樂版和副刊。
周潤發說:「其實《蘋果》嘅副刊係我最欣賞嘅,我直情當佢係良師益友,因為畀到好多資訊我,無論衣食住行、五花八門嘅事物都有介紹,所以我睇副刊係連汁都撈埋,就算我太太唔識睇中文,每晚佢都會叫我將副刊繙譯成英文讀畀佢聽,佢對教人煮菜嘅欄目最感興趣。」
喜歡閱讀的周潤發,認為現時《蘋果》圖片放得太大,文字較少的風格,他不太習慣,他說:「我始終覺得現時文字少咗啲,不過呢份報紙敢言、不畏強權,講人哋唔敢講嘅嘢,呢方面我係幾佩服。」
發哥又說:「喺政治取向方面,有時我覺得《蘋果》係有啲偏激,好似早排頭版登咗一張曾蔭權好大嘅相出嚟,然後大字標題話『香港難有新希望』;曾蔭權都未正式做特首,咁快就下呢個判斷,感覺就好似係逢中必反咁,我始終希望一份報紙可以持平,保持一個監察政府嘅功能喺度,但千祈唔好係又鬧、唔係又鬧,政府做得啱時讚吓都得啩!我作為香港一分子,當然希望香港社會可以保持喺和諧一面。」
傳真︰2623-9278
電郵︰
[email protected]