【奇妙駕到之後日開台】免費電視頻道奇妙電視將於後日開台，奇妙電視嘅免費電視牌由舊年5月31日正式發出，個牌有成12年長。
奇妙電視主攻合家歡節目，重頭係杜汶澤主持嘅飲食綜藝訪談節目《杜汶澤食住上》，有食好西，也有試劣食；黎燕珊同曾美華喺《朝拜傲媽》中訪問多位叻媽分享貼士，而《帶阿媽去旅行2017》則賣母女情，邀李司棋同囡囡葉子青、李彩華母女、方健儀母女出埠旅行，仲有盧海鵬同趙海珠等測試香港人特質嘅《放試》，同埋邵仲衡同林二汶主持介紹香港情懷嘅《香港事．香港是……》，邵仲衡日前仲親身試整木製傢俬。

有《鬼怪》睇

劇集方面，攞到韓國男神孔劉主演嘅《鬼怪─孤單又燦爛的神》播映權，仲有方中信同林峯主演嘅內地劇《六扇門》，自家製作有鄭融主演嘅《100天》等。此外，奇妙電視77台透過固網傳送訊號，再經公共天綫入屋，只要係使用有線電視固定網絡系統嘅大廈，住戶就可以重新搜台接收奇妙電視嘅數碼同模擬訊號。