眾所周知，勞福局長羅致光（CK）好熟書，佢噚日發表網誌向議員出擊，質疑部份人評論香港社福規劃時冇細閱相關文件同報告，寸爆話唔知香港人係咪好忙，更不點名話有位身為社工嘅立法會議員，曾喺施政報告致謝辯論時冇熟讀文件，矛頭似乎指向工黨「鬍鬚俠」張超雄。
CK喺網誌話，有議員喺施政報告辯論期間，就安老服務計劃方案建議資助長者聘請外傭問題發言話「這點我們完全沒有討論過，我認為這簡直是石破天驚」，批評議員說法有誤，冇熟讀文件。

被指口舌之爭轉移視線

翻聽錄音，鬍鬚俠當日兩度講「石破天驚」，但分別係講緊施政報告提出嘅社區照顧「零輪候」及安老事務委員會主席林正財話過需要引入多30萬外傭嘅建議！
八方問過鬍鬚俠，佢話「石破天驚」根本唔係回應緊CK所講嘅資助長者聘請外傭問題，批評CK作口舌之爭，係為咗轉移視線。咁又係喎，噚日咁啱多個社福界團體組成民間社福改革戰線，不滿政府成立嘅「優化整筆過撥款津助制度檢討專責小組」缺乏代表性。CK同時不點名提及另一位社工立法會議員唔熟書，唔知係咪講緊社福界立法會議員邵家臻嘞，但邵家臻都回應話口舌之爭無補於事。

李八方