今輪的金融海嘯，衝擊久久未散，反而逐層加深，簡直是極度恐怖。昨日港股大跌市，不少以往被稱為穩健大價股的股份，都被洗倉式沽售，仿似無底深潭，包括中通信（552）暴跌32%、中興通訊（763）勁跌24%及ASM太平洋（522）跌11%。
以上股份，共通點是受到企業暫停資本開支影響最大。在當前的金融危機，企業想問銀行借錢融資，維持基本營運都有困難，要投資生產設備或者增加資本開支，諗都唔使諗。作為設備供應商，研發隊伍龐大、固定開支所佔比例唔低，幾張大型定單唔見咗，盈利影響會好勁。

共用資源　定單必減

當然，中通信及中興兩隻電訊設備生產商主要市場在內地，電訊基建也不一定大幅萎縮。不過，中國工業和信息化部本周一晚在官網發出通知，為減少重複投資，規定內地電訊商即時起，須共用基站等基建資源，要求運營商已有鐵塔、杆路必須共享；新建鐵塔、杆路必須共建；其他基站設施和傳輸線路具備條件的應共建共享，並禁止租用第三方設施時簽訂排他性協議。
對於以上新政策，野村樂觀估計，聯通（762）及中電信（728）未來3年因而分別節省169億及89億元人民幣。電訊商節省資本開支，德銀及花旗均認為會對電訊基建承辦商中通信構成負面影響。該股昨日暴挫，應是新政策影響加上恐慌跌市造成的結果，單日股價跌去近三分一，市值唔見31億，簡直是重創。今時今日兵荒馬亂，股票市場真係乜嘢都可以發生，可怕。
歐陽風