美國真人騷節目捧紅咗KimKardashian一家，其中Kim嘅65歲繼父布魯斯詹納（BruceJenner）今年同Kris結束咗24年婚姻，之後佢接受變性手術，仲改名凱特琳（Caitlyn），打扮舉止比唔少真女人更加女性化。凱特琳嘅決定得到家人嘅支持，但就一路未見過佢同前妻Kris見面。

終於為咗慶祝佢哋個女KylieJenner嘅18歲生日，凱特琳前晚全家出動去到加州馬里布一間餐廳慶祝，凱特琳同Kris首次被影到同場，佢哋唔止有合照，仲喺餐廳門口攬攬，據指佢哋其實喺上個月尾已經喺凱特琳屋企見過面，睇嚟Kris都已經接受咗「前夫」呢個決定，關係仲幾好㖭。