由於早前有個英國記者俾人捷足先登，攞咗張今次世界盃嘅採訪記者證，英格蘭國家隊就以安全為理由，取消咗禮拜一、二嘅傳媒採訪；但計我求大俠話，佢哋只係借勢擾敵，費事畀瑞典知咁多軍情。
家陣球迷最關心嘅問題，梗係碧咸打唔打到對瑞典場波啦；不過英格蘭「閉門造車」，咁即係話碧咸嘅傷勢進展成點，根本就冇人會知。另外，英格蘭領隊艾歷臣喺暫停採訪前，高調話希斯基會喺對瑞典場波打正選。之但係，係人都知希斯基係英格蘭必然正選；所以艾歷臣咁講，等於無講任何嘢。
英格蘭隊波家陣五癆七傷，中場幾乎冇晒人，相反瑞典就可以夫添，跑慣江湖嘅艾歷臣梗係要諗諗計啦；而最好嘅方法，就係唔好畀對手知咁多嘢。不過，所謂紙包唔住火，𠵱家啲傳媒咁神通廣大，艾歷臣真係避得一時，避唔得一世。

史奈達投打機玩物喪志
球員通常都係投訴酒店啲設施唔掂，但係德國中場史奈達竟然反傳統，話房間入面嘅電視遊戲機駁唔到線，搞到佢冇得玩。睇嚟史奈達似乎唔記得嚟日、韓係要爭世界盃，唔係嚟打機。所謂「玩物喪志」，史奈達應該學似意大利班球員咁，得閒就睇吓書，無謂浪費精神打機啦。

卡洛斯自大被窒
早排巴西球星卡洛斯食咗大蒜，話巴西四成功力已經可以搞掂土耳其，搞到土軍領隊火都嚟埋，反咬卡洛斯一啖；指踢皇馬嘅佢，喺兩年前嘅歐冠盃輸畀加拉塔沙雷之後喊晒口咁，重反問卡洛斯嗰場波究竟使出咗幾多功力？我求驗客今次就唔幫卡洛斯啦；事關佢口氣大成咁，唔尊重人，又冇乜品。