立法會上星期開夜車表決預算案，當大部份議員捱眼瞓開會之際，詹培忠同寶哥哥卻歸家會周公，緊張拉票嘅財爺鬍鬚曾，當日凌晨時分原來派出頭馬財經事務及庫務局常任秘書長應耀康，分別致電兩個議員，但都無功而還。
詹培忠噚日同八方講，當時好夢正酣，接到午夜凶鈴都唔願起身，加上鬍鬚曾已經夠票通過預算案，所以佢同應耀康講咗句「我瞓覺喇！」就匆匆收線，咁唔畀面，事後自然有人向佢詐型，不過佢話已經留到夜晚9點，二讀時投咗支持票，做足本份，鬍鬚曾仲想點？
其他要捱夜投票嘅議員唔「恨」得咁多，詹培忠話呷醋都冇用，呢個世界好現實，有票就有權，佢同寶哥哥唔使求政府、西環都有票，自然瞓得安樂。