趙頌茹（阿Yu）同黃芷晴今日去到大埔參與「新地足球潮玩之旅」開球禮，並接受德國名宿希士拿（Thomas Hassler）傳授控球技巧，身穿巴西球衣嘅阿Yu踢起波時有啲雞手鴨腳，而芷晴亦無遺傳爸爸黃日華嘅足球天份，踢得有啲狼狽，不過Thomas都讚兩人踢得不錯。

事後阿Yu強調自己有運動天份，不過唔喺球類方面，講起足球，原來兩人都係孝順女，自細已經陪爹哋睇波，雖然完全睇唔明要每事問，但都樂在其中，芷晴指爸爸逢星期三最雀躍，因為會同明星足球隊踢波。問到睇波係睇球技定靚仔？阿Yu話：「初時睇球技，然後睇樣同身型。」芷晴直認睇靚仔先，希望追捧擁型仔球星尼馬嘅巴西隊奪盃。

早前阿Yu指留待大女考完試，才告知爸爸周永恒再婚嘅事，阿Yu今日話：「啱啱講咗，佢明白了解件事，冇乜嘢，畀啲時間慢慢觀察。」佢覺得大女長大不少，已經明白事理，加上媽咪跟女兒傾偈，感覺會較容易溝通。（新聞連結： https://bit.ly/2JpMhlD ）

精選娛聞，喺晒《娛果》
http://fb.com/appledailyent