人改名易過改電話號碼，上市公司改名先煩公司秘書，後煩IR同PR，人力資源就梗係走唔甩，牽一髮動全身，所以身痕都未必搵呢啲嘢嚟搞。Samantha前幾日喺內地網站睇到，有間大陸上市公司15年改咗12個名，最新叫做「千足珍珠」，兩日股價升咗15%，有日更加升到停板，唔通真係改個好名有運到？
內地股民見到隻股咁巴閉，索性叫啲蟹緊啲股改一改名，好似中石油（857）改做「偉哥石油」；就算工商銀行（1398）改做「不傷銀行」都無所謂。轉名求股價突破，最想改名重生可能係志道國際（1220），佢前身係海域集團，年頭復牌後，個名太深入民心，成交疏落股價長期做「膠龍號」──寸草不生。
不過，唔係個個運滯先至改名，有啲希望再上一層樓，好似麗悅酒店（2266）將會改名做帝盛酒店，旗下大部份酒店以帝盛命名，純粹做品牌定位。佢喺祖國嘅酒店幾百蚊晚就有交易，舊年純利增長勁，又出售物業套現，待1.40元附近買入。

Samantha
本欄逢周一、三、五刊出